Eusko Jaurlaritza bera, Lanbide, bai eta Euskal Administrazio asko ere, hasi dira beren Enplegu arloko Plan eta Estrategiak berraztertzen eta berrabiarazten, bai eta indarrean diren arau-esparruak ere. Beraz, bultzada-unean gaude, hau da, ikuspegiak birpentsatu eta estrategiak berritu behar dira, eta behar bezalako espazioak sustatu, zertarako eta, alde guztien elkarrekiko menpekotasuna aitortuta, lantze sistemikoagoak egiteko, begirada pertsonengan pausatze aldera; bereziki, kalteberagoak diren haiengan, hainbat neurri hartuta, lan-merkatuan dituzten zailtasunak gainditzeko eta beren bizitzako beste arlo ukitu batzuetan ere laguntzeko.

Sendotu Aldiberean osatzen dugun erakundeok lan-merkatua eraldatzeko prozesuak eta hartan diren joerak nabarmendu nahi ditugu, Covid-19ak eragindako krisiak areagotuak, eta nola eragiten dieten bereziki pertsona kalteberei eta baztertuak gelditzeko arriskuan direnei. Eta geure buruari galdetzen diogu ea posible ote den testuinguru horretan enplegu inklusiboa eta kalitatezkoa pertsona horientzat, desio hutsez harago. Egingarria al da? Zein dira hori egiazki lortzeko gakoak? Zer eragin dute eta izango dute aldaketa horiek pertsona kalteberen enpleguan edo langabezian? Zein dira hartu beharreko neurririk premiazkoenak eta garrantzitsuenak? Zein dira baliabideak eta ikuspegiak? Nola sor ditzakegu elkarlanerako espazioak Instituzio Publikoen, Enpresen eta Enplegu Eragileen artean? Zer eginkizun zehatz izan behar du Hirugarren Sektoreak, Enpleguan diharduen Eragilea den neurrian?… Zein da ekarpena politika sozialen eta pertsonak gizarteratu eta laneratzeko ibilbideen etapa honetan?

Gure iritziz, une erabakigarrian gaude lan-merkatuaren portaeran eta haren aldaketa emergenteetan, eta komeni da haien eraginaz gogoeta egitea.

Testuinguru honetan, enplegu inklusiboa eta kalitatezkoa egiazki lortuko bada, instituzioek are ahalegin handiagoa egin beharko dute gaur egun alor horretan egiten dutena baino eta, era berean, areagotu beharko da euskal enpresek enpleguarekin duten konpromisoa, eta Euskadiko enplegu-sistema osatzen duten gainerako eragileek beren inplikazioa ere berretsi beharko dute.

Oharra: Sendotu Aldiberean EAE2014-2020 Programa Operatiboaren baitan sustaturiko proiektu bat da, betiere Sartu Taldea, Caritas Bizkaia, Peñascal eta Agiantza osatzen duten erakundeek bultzatua.